LA UNION – Rurog wenno tulang laengen ni Lola Corazon Untalasco, 89-anyos, ti Barangay Bagbag, Bauang, La Union iti nadanon dagiti otoridad a mapan koma mangidanon ti ayuda kenkuana.
Idi bigat kalman, nagturong dagiti miyembro ti Regional Special Training Unit 1 (RSTU 1) iti pagnanaedan ni Untalasco, ngem saan dan a nasangpetan a sisibiang ti lola, agsipudta pimmusayen daytoy idi pay Nobyembre 9 ti agdama a tawen, segun iti anakna a ni Anghel.
Nakita dagiti otoridad a rurog laengen iti nabati ti bangkay iti mismo nga arubayan ti Untalasco, a naabbongan ti lupot ken sako.
Kadwa ti RSTU 1 ti Bauang PNP a nangiturong iti rurog ni Untalasco iti kamposanto tapno maipaayan ti nasayaat a pannakaitabon.
Kabayatanna, iti pannakiuman ti Bombo Radyo La Union kenni Barangay Kagawad Patricia Tupaz ti Barangay Bagbag, kinuna na a sipud nadayamgus ni Lola Corazon idi bulan ti Hulyo, saan unayen daytoy a rumrumwar iti pagnanaedan na.
Nupay kasta, namin-adu a daras a sinarungkaran da daytoy tapno ipaayan ti tulong, sakbay a naamwan a pimmusayen daytoy.
