LA UNION – Maysa a bangkay ti lalaki iti nasarakan a tumtumpaw iti karayan idiay Barangay Paratong Norte, Bangar La Union.
Nakita ti sumagmamano a residente ti nasao a lugar iti bangkay agarop alas 7:30 ti rabii idi Oktubre 2,2023.
Nabigbig daytoy iti nagan a Nestor Maglapa Reconosi agtawen ti 44, awanan asawa ken residente ti Brgy. Calliat, Balaoan La, Union.
Maibasar ti impormasyon ti Bombo Radyo La Union manipud kenni PMaj Cresencio Abila Jr. agdama a chief-of-police ti Balaoan Police Station, kinunana a ti biktima ket isuti sapsapulen ti pamilya Reconosi, a naipadamag a nagpukaw idi Setyembre 26, agdama a tawen.
Maibasar iti report, mapan koma alaen ti biktima dagiti impastor na a dingwen, asideg iti Maloyo River idiay Barangay Calliat, Balaoan La Union ngem saanen a nakaawid daytoy.
Naamwan a napigsa iti buyat ti tudo idi Setyembre 26 a posible a nakaiyanudan ti biktima bayat ti panagballasiw na iti karayan.
Kinumpirma iti maysa a kabsat ti biktima, managan Tessie Yasay Reconosi, 49 anyos, residente met laeng ti Barangay Calliat, Balaoan a kabsat da iti nasarakan a bangkay, gaputa pagilasinan da ti suot daytoy a short pants ken addaan ti tattoo iti kannawan nga abaga na.
