LA UNION – Sinuspendi ti Office of the Ombudsman ni Bamban Mayor Alice Guo ken dua nga empleyado ti lokal a gobyerno idiay Bamban, Tarlac ti innem a bulan.
Iti siyam a pinanid a resolusyon, imbaga ti Ombudsman a nangato ti posibilidad a ma-impluwensiyaan dagiti respondents dagiti testigo wenno ma-tamper iti anyaman nga ebidensiya iti kaso gapu iti bileg ken awtoridad dagiti respondent.
Iti addang ti Ombudsman ket kasaruno ti indatag da a reklamo a kinakusit kadwa da ti Department of the Interior and Local Government (DILG) kontra iti nasao a mayor idi Mayo 24 gapu iti pannakairamanna iti na-raid a Philippine Offshore Gaming Operator (POGO) iti masakopanna idi Marso 13 nga iyop-operate ti Zun Yuan Technology Inc. a naka-diskubrian iti adu ken nagduduma a klase ti cellphone nga adda pakainaiganna iti operasyon ti POGO.
Adda pay nasurok 600 a Pilipino ken gangannaet a naisalbar iti naiganwat a raid.
