LA UNION – Nakalidayan ni Surigao del Norte Representative Robert Ace Barbers iti damag a nagpositibo iti drug test dagiti 37 a kameng ti Public Safety and Security Office idiay Davao City.
Segun kenni Barbers , uray iti siyudad ti Davao a pagnanaedan ti manggur-gura unay iti iligal a droga ket saan a natalged, isunga kasapolan ti whole-of-govt approach tapno masungbatan ti problema iti iligal a droga ditoy pagilian.
Innayon pay ni Barbers a kas Chairman nti House Committee on Dangerous Drugs, agpan-panawagan daytoy iti PNP ken PDEA nga ipamaysa iti panang-parmek ti source ti iligal a droga idiay Davao City.
Suportado met ti mammanday linteg dagiti addang ni Mayor Baste Duterte a mangrisot ti problema iti maipaw-pawil a droga iti siyudad.
Nagballaag ni Barbers kadagiti sindikato ti droga a mabil-bilangen ti aldaw iti panangilungalong iti pannakaisubli ti dusa a patay ditoy pagilian.
Impaganetget ni Barbers a nu iti panagkita dagiti sindikato ket mapasoksokan da ti amin, nagbiddut kunana dagitoy.
Gaputi dayta, tarigagay ni Barbers a biagen iti death penalty ditoy pagilian.
