BR LA UNION – Inarestar dagiti nagresponde a kameng ti Luna Police Station ti maysa a lalaki a maipagarop a nangriribok iti maysa a lamay idiay Brgy. Busel-busel, Luna, La Union idi Pebrero 17, 2025 agarop alas 2:45 ti parbangon.
Binigbig ni PCol. Heryl L. Bruno, director iti La Union Police Provincial Office (LUPPO), iti suspek nga agtawen ti 57, addaan asawa, ken residente ti nasao a barangay.
Maibasar iti impormasyon, rinespondian dagiti otoridad iti report seknan iti mapas-pasamak a komosyon wenno riribok iti lamay, ngem natalnan ti sitwasyon idi simmangpet dagiti otoridad.
Nupay kasta, nadlawan dagiti pulis iti mapagdudua-an a garaw ti suspek ket sinurot da daytoy agingga a nadiskubre da iti maysa a paltog a ginandat na nga itinnag.
Naamwan a ti nasao a paltog ket maysa nga Elite Shooters Caliber .45 nga addaan ti dua a bala.
Iti suspek ket sumangsango ita ti kaso a panaglabsing iti RA 10591 in relation to Comelec Resolution No. 11067 ken naipilan daytoy iti Office of the Provincial Prosecutor idiay ili ti Luna.
