BR LA UNION – Mismo a ni sigud a President Rodrigo Duterte iti naggapwan ti damag a maipagarop nga addan inruar nga warrant of arrest ti International Criminal Court (ICC) kontra kenkuana.
Inaramid na ti waragawag iti sangwanan dagiti Overseas Filipino Workers kabayatan ti campaign rally dagiti senatorial candidates ti partido da, iti Southorn Stadium idiay Wan Cai, Hong Kong idi kalman, Domingo, Marso 9.
Kadwa na a dimmar-ay iti nasao nga event ti anak na a ni Vice-President Sara Duterte.
Impaganetget ni Duterte nga anya koma ti basol na ket inaramid na laeng ti amin a kabaelanna idi adda pay iti turay tapno maipaayan kunana ti sangka-bassit a kina-ulimek ken natalna a biag dagiti Pilipino.
Pa-angaw pay nga imbaga na kadagiti Pilipino a pagtitinnulongan da a mangipatakder ti monumento na, a maiyabay iti monumento ti national hero a ni Jose Rizal, ingkaso a mabalud daytoy gaputi panang-kamat kenkuana ti ICC.
Iti ICC ti mangim-imbestigar iti sigud a presidente seknan iti maipagarop a panaglabsing ti karbengan pantao gaputi nadara a kampanya kontra iligal a droga iti sidong ti administrasyon na.
Kabayatanna, dagus met a nangirwar ti waragawag iti Palasyo ti Malakanyang, babaen kenni Presidential Communications Office (PCO) Undersecretary Claire Castro idi met laeng kalman, Domingo.
Impaganetget ni Castro nga awan ti kumpirmasyon manipud Malacañang seknan iti nasao nga arrest warrant.
