BR LA UNION – Kinaswan ti National Bureau of Investigation (NBI) ni Atty. Raul Lambino gapu iti panangiwaras ti peke nga impormasyon.
Karaman a kinaswan ti NBI idiay Department of Justice (DOJ) ni sigud a National Youth Commission (NYC) commissioner Ronald Cardema.
Kinuna ni NBI Technical Intelligence Service Agent Allen Rey Delfin, sumangsango dagiti dua ti panaglabsing iti Article 154 ti Revised Penal Code wenno unlawful use of means of publication wenno unlawful utterances.
Mabalin a mabalud dagitoy ti maysa a bulan ken mamulta manipud P40,000 agingga P200,000.
Nagramot ti kaso idi naipa-arestar ni sigud a President Rodrigo Duterte, idi Marso 11 ket iti live video ni Lambino, inwaras na ti peke nga impormasyon, nga adda inruar ti Korte Suprema a Temporary Restraining Order (TRO) iti panang-aresto kenni Duterte, ngem ti kinapudno na ket awan ti naiyetnag a TRO.
Kasta met laeng iti inaramid ni Cardema idi ma-interview idiay Villamor Air Base tapno depensaan ni Duterte.
