BR LA UNION – Umaboten iti 40 a tattao ti natay bayat a nasurok 1,200 ti nadun-dunor kalpasan ti napigsa a panagbettak idiay Bandar Abbas, ti kadackelan a container hub ti pagilian nga Iran.
Partikular a nagtaudan ti napigsa nga explosion idiay Shahid Rajaee Port idi Sabado, Abril 26.
Segun kadagiti opisyal, nangrugi ti panagbettak manipud iti nauram a bodega dagiti kemikal ken delikado a materyales.
Naipadamag a maysa kadagiti bimtak ket iti sodium perchlorate, maysa a ramen iti panagaramid ti solid fuel para kadagiti missiles.
Nangparnuay ti insidente iti napuskol ken nangisit nga asok iti nasao a lugar nga uray 20 nga oras a nalpasen ti panagbettak.
Temporaryo a nasuspinde ti serrek kadagiti pagadalan ken opisina nga asideg iti nasao a lugar gaputi nakaru a polusyon iti angin.
Narikna pay ti panagdayyeg agingga iti kaadayu a 50 a kilometro.
Mainaig ti daytoy, nangidanon ti pannaki-simpatiya ni Iranian President Masoud Pezeshkian iti pamilya dagiti natay kasaruno ti panangimandar na ti nainget nga imbestigasyon.
Nangipeksa met ti suporta iti naduma-duma a pagilian kas ti United Arabe Emirates (UAE), Saudi Arabia, Pakistan, India, Turkey, ken iti United Nations.
Nagpatulod met ti tulong ni Russian President Vladimir Putin.
Nupay maibilang nga aksidente iti insidente, napasamak daytoy kagiddan iti panagsarita ti Iran ken Estados Unidos idiay Oman seknan iti programa a nuclear ti Tehran.
Naamwan nga idi 2020 tinarget ti cyberattack manipud Israel iti nasao met laeng a pantalan.
Naideklara ti tallo nga aldaw a National Mourning idiay Hormozgan Province.
