BR LA UNION – Nadagsen nga akusasyon iti inebbatan ni Vice President Sara Duterte kontra iti administrasyon ni President Ferdinand Marcos Jr., iti tengnga ti bumarbara a susik iti baetan ti dua a kangatuan nga opisyal ti gobyerno.
Iti maysa nga interview, imbaga ni VP Duterte a saan nga agsardeng dagiti atake kontra kenkuana ken iti pamilya na agingga a saan isuna a mabalud wenno matay.
Rimuar dagiti nasao a waragawag sumagmamano nga aldaw kalpasan a makaswan ti physical injuries ken grave threats ti kabsat na a ni Davao City Rep. Paolo Duterte seknan iti maipagarop a panangdangran ti maysa a negosyante iti bar idiay Davao idi Pebrero—a napakuyogan ti CCTV footage.
Ngem impaganetget ni VP Sara, nga awan pakainaigan iti lokal a pulitika idiay Davao ti reklamo kontra kenni Rep. Paolo Duterte.
Imbaga na a ti Philippine National Police ken Criminal Investigation and Detection Group (CIDG) mismo ti adda iti likudan ti kaso.
Maipagarop a saan a maaburido iti nagsasaruno nga isyu kontra iti pamilya na: manipud iti pannaka-aresto ti ama na a ni sigud a President Rodrigo Duterte, idiay The Hague; iti mapad-padaanan nga impeachment trial inton Hulyo; agingga iti kaso ti kabsat na.
Segun iti Bise Presidente, adda dagiti abogado da a mangiggem kadagitoy.
Nupay kasta, maipagarop nga adda makit-kita na a “bright side” iti sitwasyon: nga agbalin a mas informed dagiti umili nu siasino ti maipabeng nga ibotos.
Nagpasagid pay ni Duterte iti Palasyo, ngem saanna a direkta a dinakamat ni President Marcos.
Kinuna na a saan a maallilaw dagiti Pilipino babaen kadagiti atake as pulitikal bayat nga agkur-kurang ti administrasyon kadagiti konkreto a programa para iti pagilian.
Kinuna na nga agsap-sapol dagiti umili iti pudpudno a panagdur-as ken kinakapya, saan a parikot iti gobyerno.
Uray kasatnu kunana ti atake, saan a mapabanglo ti administrasyon agsipudta maipagarop a saan pay a makita iti ibagbaga da a ‘Bagong Pilipinas’.
