BR LA UNION – Sumangsango iti reklamo ti saan a bumaba iti sangapulo a menor de edad kalpasan ti maipagarop a panagtakaw ti dua a case ti assorted softdrinks iti maysa a sari-sari store idiay Barangay Dallangayan Este, syudad ti San Fernando, agarop ala 1:00 agingga alas 2:00 ti parbangon idi Biyernes, Hunyo 26.
Dagiti suspek ket agtawen laeng iti trese, katorse, kinse, ken dise-sais manipud barangay Santiago Norte ken kabangibang a barangay.
Nagtaud ti reklamo kalpasan a pasingkedan ti nagviral a close circuit television camera wenno CCTV footage iti mismo panagtakaw da. Iti grupo ket nagusar ti dua a tricycle nga agmaris ti nalabbaga ken berde, ken naala pay ti body number ti maysa a trayskel a “1227-P”.
Segun ti makinkukua ti sari-sari store a ni Mrs. Pajimola, nakaikabil iti ruar ti tarsena na dagiti dua a case ti assorted soft drinks idi naklaat daytoy a mabigatan nga awanen dagiti lako na.
Iti interview ti Bombo Radyo La Union kenni Gilbert Marquez Duclayan, Barangay Captain ti Santiago Norte ditoy ciudad, inbatadna nga nagturong iti barangayda ti mister iti akinkukua ti sari-sari store kadwa ti barangay captain ti Dallangayan Este tapno pormal nga ireklamo ti napasamak nga insidente.
Positibo nga binigbig ti kapitan a manipud mismo iti baranggay da ti tricycle a naala iti CCTV footage.
Napartak iti pannakaduktal kadagiti menor de edad kalpasan iti pangi-upload ti maysa kadagiti suspek iti reels ti social media nga ipaspasikat da ti mismo a panangala ken panag-inom kadagiti soft drinks a tinakaw da.
Kabayatanna, nakatuding iti panagsasango ti biktima ken dagiti suspek kadwa dagiti nagannadakda tapno masungbatan dagiti saludsod seknan iti napasamak nga insidente.
Kabayatanna, nagpalagip met ti kapitan kadagiti nagannak a siguradwen a nakaawiden dagiti annak da, nangruna iti rabii ken menor de edad pay dagitoy.
