Nagtalinaed iti 0.4% iti case fatality rate ti dengue ditoy Pilipinas wenno katukad ti uppat a matmatay tunggal 1,000 a kaso.
Segun kenni DOH Spokesperson Albert Domingo, panggep ti ahensia a gibusan iti bilang dagiti matmatay gapo iti dengue, kasaruno ti panagngato dagiti kaso idi napalabas a tawen.
Maibasar iti datos ti ahensya, manipud bulan ti Enero agingana Marso agdama a tawen ket nakailista iti pagilian ti 62,313 dengue cases, 73% a nangatngato maidasig iti kapada a panawen idi 2024.
Kangatwan a bilang ket manipud kadagiti rehiyon ti CALABARZON, NCR, ken Central Luzon.
Bimmaba met iti case fatality rate iti 0.35% ita a tawen manipud iti 0.42% idi napalabas a tawen.
Nupay kasta, nagballaag iti DOH a dagos a kumonsulta iti doktor no makarikna ti sintomas ti dengue.
Innayon pay ni Domingo, kaadwan kadagiti pimmusay ket saan a naipapaayan ti maiyannatup a panakataming.
Napateg pay iti hydration wenno panangited ti swero kadagiti pasyente.
Kabayatanna, inlawlawag ti tagapagsarita a saan a maapektaran iti serbisyo ti PhilHealth iti laksid ti maisaysayangkat a restructuring iti ahensya.#
