BR LA UNION – Inpadamag ti Philippine National Police (PNP) a 12 a tattao ti natay gapu iti layus a napasaran iti nalawa a paset ti pagilian gapu iti napigsa a tudo sipud idi dimmuprak ti Bagyo Crising ken pinakaru ti habagat .
Segun kenni PNP chief information officer Brig. Gen Randulf Tuaño, kaaduan kadagiti natay ket gapu iti pannakalmes, a pakaibilangan ti lima manipud idiay CALABARZON idinto a tallo idiay Negros Island Region.
Dua pay kadagiti biktima ti kalamidad ket manipud MIMAROPA ken Metro Manila.
Segun pay iti maysa nga opisyal ti PNP, dagiti dua a natay ket natupakan ti naspak a kayo idiay Northern Mindanao ken idiay Bangsamoro Autonomous Region in Muslim Mindanao.
Kabayatanna, adda lima a naireport a mapukpukaw gapu iti layus idiay Metro Manila, 3 manipud Western Visayas ken maysa idiay CALABARZON.
Maibasar iti datos ti Philippine National Police agingga idi rabii ti Martes, Hulyo 22, nasurok a 144,000 nga indibidual manipud iti nasurok 39,000 a pamilya ti agdama nga adda kadagiti evacuation centers iti nadumaduma a paset ti pagilian kalpasan a naiyakar da gapu iti nakaro a layus.
Tumultulong ti PNP iti search and rescue operations kadagiti naapektaran iti kalamidad, uppat kadagiti 12 a naipadamag a natay iti didigra ket narekobre iti police search and rescue teams.
Inreport pay ni Tuaño a dandani 300 a pulis ti naapektaran iti kalamidad.
