Nadiskubre dagiti sientista dagiti serye ti stone tools idiay Indonesia partikular iti Sulawesi Island, a posible nga ebidensya dagiti tattao a nabiag ti 1.5 milion a tawenen ti napalabas iti isla a nagbaetan ti Asia ken Australia, iti kaunaan a mabigbig a tao iti Wallace region.
Natakwatan dagiti archaelogists manipud pagilian nga Australia ken Indonesia iti uneg ti daga a masakupan ti Soppeng region idiay South Sulawesi, iti maysa a bassit ken dadael a tools a naaramat tapno mangiwa kadagiti babassit nga ayup ken mangukit kadagiti bato.
Iti radioactive tracing kadagitoy a tools ken dagiti ngipen ti ayup a nasarakan iti lugar ket napetsaan ti agingana 1.48 million a tawenen ti napalabas.
Segun iti maysa nga artikulo nga impablaak dagiti archaeologists iti journal Nature ita a bulan ti Agosto, dagiti takwat ket mabalin a mangbaliw kadagiti teorya ti early human migrations.
Iti paga-ammo ket nagtalinaed laeng iti Flores Island ti Indonesia ken Luzon Island ti Pilipinas dagiti kaunaan a Wallacean humans ken pre-historic persons nga am-ammo kas Homo Erectus agarop 1.02 million a tawenen ti napalabas, kasta met iti paga-ammo nga awan ti kabaelan da nga agdalyasat iti taaw, maisupadi dagiti takwat idiay Suwalesi a mangpaspasingked iti theories of migration.
Segun kenni Adam Brumm, lead archaeologist manipud iti Griffith University idiay Queensland, Australia, dagiti artefacts ket pinartuat dagiti kaunaan a tao a nagnaed iti Earth sakbay iti ebolusyon ti Homo Sapiens.
Innayon na pay, posible nga iti Homo Erectus ket manipud iti Asian mainland a ballasiw ti maysa a napateg nga ocean gap iti Sulawesi Island, agarop 1 million a tawenen ti napalabas.
Iti Wallacea ket maysa a rehiyon ti Eastern Indonesia pakaraimanan dagiti sumagmamano nga isla kas iti Sulawesi, Lombok, Flores, Timor, Sumbawa a masarakan iti nagbaetan ti Borneo, Java, Australia, ken New Guinea.
Napanaganan iti rehiyon para kenni naturalist Alfred Russel Wallace a nangadal iti fauna ken flora iti lugar.#
