Mangipila ni Senate Committee on Games and Amusement Chairman Erwin Tulfo ti resolusyon tapno paimbestigaran ken pagsungbaten dagiti casino a bulag-bulagan iti posibilidad ti money laundering nga araramiden dagiti sumagmamano nga opisyales ti gobierno, usar ti kwarta dagiti umili.
Agdudua ni Senador Erwin a saan nga ammo dagiti casino nga agnanaed ti gobierno wenno opisyales ti Department of Public Works and Highways (DPWH) Bulacan First Engineering District ti agsugsugal kadakuada nga agususar ti peke nga Identification Card.
Impaganetget ti senador a saan a mabalin nga irason dagiti casino nga awan iti ideya da kadaitoy a banag agsipud ta ipanpannakkel da pay iti nainget a panangipatungpal da ti “know your client” wenno KYC policy. Daitoy iti pakasdawaan ni Tulfo ta apay a saan da nga irekomendar ken ipadanon ti Anti-Money Laundering Council (AMLC) dagiti minilyon a maipapaabak dagiti DPWH officials ti tunggal lawas.
Awan pay kunana ti imbestigasyon nu anya iti kasasaad da ti trabaho ken nu kasatno da a kabaelan ti agtaya kadagiti nagkakadakkel kasta met iti agpaabak ti minilyon a pisos idinto a saan da met a tycoons wenno bilyonaryo. Makitkita ita ni Tulfo a pinili dagiti casino iti agtalna tapno pagkwartaan dagiti isugsugal dagiti kameng ti DPWH Bulacan.
