BR LA UNION – Maragsakan ti International Criminal Court (ICC) iti nagbalin a verdict wenno pangngeddeng kenni Ali Muhammad Ali Abd-Al-Rahman wenno mas nalatlatak iti nagan na nga Ali Kushayb, iti 27 a kaso ti war crimes ken crimes against humanity seknan ti nalawa a kinadamsak idiay Darfur, Sudan manipud Agosto 2003 agingga Marso 2004.
Ni Kushayb, ket sigud a nangato nga opisyal ti Janjaweed militia, maysa nga armado a grupo a sup-suportaran ti gobyerno ti Sudan ken nalatak kadagiti brutal a kampanya kontra rebelde a grupo idiay Darfur.
Kabilang dagiti inaramid na a krimen idiay Darfur ket iti murder, torture, rape, ken persecution, a maipagarop a paset iti nalawa ken sistematiko a panagraut idiay West Darfur.
PAKASARITAAN TI HUSTISYA
Segun iti ICC, daytoy ti umuna a nagbalin a conviction idiay Darfur ken umuna a naidatag a kaso, nga addaan ti napintas a resulta kalpasan nga in-refer ti United Nations Security Council iti ICC idi 2005.
Impaganetget ti ICC, a daytoy ti umuna nga insayangkat da a pangngeddeng ti Korte iti gender-based persecution, kabilang iti panagrames kadagiti babbai ken ubbing a babbai.
Napaneknekan ti prosekusyon nga adda sungsungbatan ni Kushayb iti suppression kadagiti lallaki iti Fur tribe maibasar iti ethnic, politikal, ken gender background.
PANAGTALEK ITI HUSTISIYA
Segun kenni Deputy Prosecutor Nazhat Shameem Khan, iti desisyon ti pagukuman kontra kenni Kushayb ket panangbigbig iti kinatured ken kinabanwar dagiti ribu a biktima iti nalawa a pammapatay idiay Darfur.
SUMARUNO NGA ADDANG
Kabayatanna, nakatuding nga isaruno ti korte iti sentencing phase tapno pagdesisyunan iti maipataw a pannusa kenni Kushayb.
Agtultuloy nga agpan-panawagan ti ICC para iti panang-aresto iti dadduma pay nga addaan ti outstanding warrants, kabilang da sigud a Sudan President Omar Al Bashir, Ahmad Harun, ken Abdel Raheem Muhammad Hussein.
Agtaltalinaed nga aktibo iti imbestigasyon ti ICC idiay Darfur, kagiddan iti panawagan para iti hustisya ken kinakapya iti rehiyon.
