BR LA UNION – Naamwanen ti Bureau of Fire Protection (BFP) iti makagapo ti pannakauram iti Department of Public Works and Highways (DPWH) Bureau of Research and Standards idiay Quezon City idi aldaw kalman, Miyerkules, Oktubre 22.
Segun iti BFP National Capital Region, ti nasao nga uram ket gaputi napasamak a short-circuit manipud iti bobeda ti Records section a masarakan iti maikatlo a kadsaaran ti pasdek.
Ngem inlawlawag ti BFP nga agtultuloy ti naun-uneg pay nga imbestigasyon da iti nasao nga insidente.
Immunan nga imbaga ti DPWH a ti apoy ket nagtaud iti nauram a computer iti Materials Testing Division.
Impaganetget ti DPWH nga awan ti nairaman kadagiti napapateg a dokumento a konektado iti flood control projects anomalies.
Maipalagip a nangrugi ti uram agarop alas 12:30 ti aldaw ken naipangato iti maikatlo nga alarma ken nasebseban iti oras ala 1:49 ti malem.
