BR LA UNION – Nailista ti Philippine Institute of Volcanology and Seismology iti panag-bussog ti crater ti bulkan Kanlaon iti tengnga ti mapas-pasaran a panagtudo idiay Visayas, gaputi bagyo Tino.
Maibasar iti report nga inruar ti Phivolcs, nakarehistro manen ti bulkan iti agingga lima a volcanic earthquake bayat ti kangitingitan ti tudo.
Nangiruar pay ti asok nga agngato ti 200 a metro ken naiyangin a nagturong iti abagatan a paset ti bulkan, bayat nga iti dadduma a paset daytoy ket mangipak-pakita met laeng ti pagilasinan ti panagbettak.
Maipalagip nga umaboten iti 2,245 a tonelada nga asupre ti impugso ti bulkan iti kallabes nga aldaw.
Kagiddan ti agtultuloy a panagtudo iti nasao a lugar, saan nga ilaksid ti Phivolcs ti posibilidad ti kellaat a panagbettak wenno phreatic explosion.
Saan met nga ilaksid ti ahensiya ti posibilidad a panagbettak ti magma.
Idi kalman (Nov. 3), immuna a nagpakdaar ti Phivolcs iti posibilidad ti panagayus ti lahar gapu iti napigsa a tudo a gapuanan ti bagyo.
Segun iti Phivolcs, saan laeng a posible daytoy kadagiti bakras ti bulkan no di pay ket kadagiti komunidad a direkta a pagdalanan kas iti waig, kanal, ken dadduma pay a mabalin a pagayusan ti danum ken lahar.
