BR LA UNION – Nangisayangkat ti clean-up operations ti San Fernando City General Services Office kadagiti eskuelaan a nausar kas evacuation centers iti panagduprak ti Super Typhoon Uwan idi Nobyembre 9 agingga 10, 2025.
Nangrugi iti panagdalus kadagiti classrooms idi kalman, Nobyembre 11, ken naituloy daytoy ita nga aldaw, Nobyembre 12.
Dagiti eskuelaan a naaramat kas evacuation centers ket ti La Union National High School, Canaoay Elementary School, Sagayad Elementary School, ken Santiago North Elementary School.
Nairanta daytoy a panagdalus tapno masigurado a nadalus, napintas, ken nasayaat iti kasasaad dagiti eskuelaan nga usaren manen dagiti mangisursuro ken agad-adal kagiddan ti panagsubli ti klase ita nga aldaw kalpasan a nasuspinde idi Lunes ken Martes gaputi bagyo Uwan.
