BR LA UNION – Lineppas idi kalman ti Iglesia Ni Cristo (INC) iti maikadwa nga aldaw manipud iti tallo koma nga aldaw a rally kontra kurapsyon idiay Quirino Grandstand.
Segun kenni INC spokesperson Edwil Zabala, nagdesisyon da a leppasen iti maikadwa nga aldaw agsipudta nagun-od dan ti tarigagay nga ipanawagan ti hustisya ken pagrebbengan.
Maibasar iti patta-patta ti Manila Disaster Risk Reduction and Management Office, iti maikadwa nga aldaw ti rally ket umabot iti 550,000 a tattao ti dimmar-ay.
Ti nasao a bilang ket mas nababa kumpara idi umuna nga aldaw a dimmanon iti 650,000 a tattao.
Ibilang met ti Department of Interior and Local Government (DILG) a nakapya ti pakabuklan ti naisayangkat a rally.
