BR LA UNION – Nakagun-od ti Pilipinas ti dakkel a balligi iti benneg ti negosyo kalpasan nga inikkat ti Estados Unidos iti taripa a nasurok $1 billion a gatad dagiti produkto agrikultural ti pagilian, ken iti nadumaduma nga industrial goods—a mangipaay iti dandani kagudwa ti dagup nga eksport ti Pilipinas a sumrek idiay U.S. ket maiserrek a duty-free wenno awan ti bayadan a buwis.
Segun kenni Acting Finance Secretary Frederick D. Go, dakkel a tulong daytoy kadagiti mannalon agsipudta karaman kadagiti produkto a naikkatan ti 19% a taripa ket dagiti saba, niyog, mangga, dried guava, kape, tsaa, rekado, ken sumagmamano nga abono.
Impaganetget ni Go a ti pannakaikkat ti taripa ket mangpapigsa iti competitive ability dagiti produkto a Pilipino, mangpataud ti panggedan, ken mangpatalinaed ti supply chain.
Segun iti Department of Trade and Industry, umabot ti $1 bilyon iti export value dagiti produkto agrikultural idi 2024, bayat a $5.8 bilyon ti balor dagiti industrial products a kabilang iti exemptions.
Inyanunsyo ti White House idi Biyernes nga inikkat ti U.S. iti taripa kalpasan iti reciprocal trade talks ken panangsukimat ti domestic demand ken production capacity.
Iti baro a polisiya, aganay $14.5 bilyon nga eksport ti Pilipinas idiay U.S. ket sumrek nga awan ti maipataw a taripa, kabilang ti kaadwan nga industrial products kas ti semiconductors.
Kinuna da Go ken DTI Secretary Cristina Roque nga agtultuloy pay laeng ti negosasyon tapno mairaman metten dagiti garments, textiles, ken furniture iti sumaruno a batch ti tariff exemptions.
Iti 19% tariff ket impataw ti U.S. iti kaadwan a produkto a Pilipino idi Hulyo, kadwa na ti dadduma pay a major ASEAN economies.
