BR LA UNION – Nasurok 170 a pasdek ken istruktura ti nauram iti napasamak a massive fire iti nagpatnag idiay Oita City, Japan.
Ti nasao a lugar ket maibilang a densely populated residental area gaputa addaan ti nakurang a kagudwa a milyon a populasyon maibasar iti 2025 estimate ti World Population Review.
Dimmanon ti 12 nga oras a sinebseban dagiti firefighters ti nalawa nga uram, a mapapati a nagrugi idiay Saganoseki port district.
Naiyakar ti 180 a tattao, maysa ti nailista a natay, ken maysa a 50-anyos a babai ti na-ospital kalpasan a nagsagaba ti mild burn, segun kadagiti otoridad.
Nangrugi ti uram idi rabii ti Martes ket limmawa agingga iti 48,900 square metres – mapatta-patta a kalaw-lawa ti pito a soccer fields, segun iti Japan’s Fire and Disaster Management Agency .
Agtultuloy a maim-imbestigaran ti makagapo ti napasamak nga uram, a maibilang a kadakkelan nga urban fire idiay Japan sipud idi 1976 wenno kalpasan ti 50 a tawen.
