Al-allukoyen ti La Union Police Provincial Office (LUPPO) dagiti amin nga opisial ti pulisya, dagiti pamilia da, ken ti komunidad a makipamaysa iti tinawen a selebrasion ti Simbang Gabi wenno Misa de Gallo kas paset iti naespirituan a panagsagana para ti pananglaglagip iti pannakayanak ni Jesu Cristo ita a panawen ti Paskua.
Maangay ti siam a rabii ti Simbang Gabi a nangrugi idi kalman, Disiembre 15 aginggana Disiembre 24, 2025, iti oras nga alas-6 ti sardam idiay Our Lady of Fatima Chapel a masarakan iti Camp Diego Silang, Brgy. Carlatan, Siudad ti San Fernando, La Union.
Segun iti liderato ti LUPPO, panggep ti nasao nga aktibidad nga ad-adda a mapatibker iti pammati dagiti police personnel, kagiddan iti panangpapigsa ti panagkaykaysa, disiplina, ken pakaseknan – a napateg iti akemda kas public servants.
Adda met iti maisayangkat a misa iti mismo a kaaldawan ti Paskua (Disiembre 25), alas-10 ti bigat, ken iti Bisperas ti Baro a Tawen (Disiembre 31), alas-6 ti rabii.
Manamnama nga agserbi dagiti nasantuan a misa kas gundaway nga agyaman kadagiti bendision a naawat iti napalabas a tawen ken ikararag iti kinatalna, kinatalged, ken panangiwanwan iti sumaruno a tawen.
Babaen kadagiti narelihiosuan nga aktibidad, namnamaen ti liderato nga ad-adda a mapatibker ti relasion ti puersa ti polisia ken ti komunidad, ken agbiag iti pudno nga espiritu ti Paskua —ayat, panagkaykaysa, ken napasnek a panagserbi kadagiti umili.
