BR LA UNION – Nagpanawagan ni sigud a Department of Finance Undersecretary Cielo Magno a nasay-sayaat nga iyakar iti PhilHealth ti pondo para iti Medical Assistance to Indigent and Financially Incapacitated Patients Program (MAIFIP).
Kinunana a rumbeng nga agpatinggan ti patronage politics, a mapilitan dagiti pasyente nga agkiddaw ti guarantee letters manipud kadagiti politiko sakbay a makaala da ti tulong.
Ti MAIFIP ket mailat-latangan ti pondo manipud DOH tapno mangipaay ti pinansiyal a tulong kadagiti indigent patients, ngem nababalaw daytoy gapu iti nabannayat a proseso ken maipagarup nga us-usaren ti sumagmamano nga opisyal para iti impluensyia politikal.
Ti singasing ni Magno ket nasaysayaat nu ti pondo ket mapagbalin a paset ti institutionalized health financing system ti PhilHealth, a maitunos iti Universal Health Care Act.
Babaen ti nasao a wagas, direkta a maipaay ti tulong kadagiti pasyente ken saanen a nakadepende iti panangi-endorso dagiti politiko.
Idi napan a tawen, impasigurado ni Malacañang a saan a lumasat ti tulong pangsalun-at kadagiti politiko, ngem agtal-talinaed a karit ti nabingay-bingay a healthcare financing ditoy pagilian.
Kagiddan daytoy, insingasing ti Department of Health a direkta a maiturong iti ospital ti P51 billion a pondo ti MAIFIP inton sumaruno a tawen.
Segun kenni DOH spokesperson a ni Asec. Albert Domingo, inawat ti Senado ti nasao a singasing tapno masigurado a maidanon a dagus ti tulong pinansiyal kadagiti pasyente.
Namnamaen ti DOH a babaen ti baro a sistema ket agbalin a mas transparent iti panaggastos ken nabibiit a maipaay ti tulong kadagiti pasyente.
