BR LA UNION – Inpannakkel ni House Speaker Faustino “Bojie” Dy III a nakaileppas ti Kamara ti maysa a nasyunal a badyet a mapagtalkan, a kunana ket awan ti insertions, saan a naapura, ken naaramid a silulukat iti publiko ken transparent a proseso.
Segun kenni Dy, napnuan pakasaritaan ti singasing a badyet saan laeng a gapu iti nalawag a proseso ngem gapu pay iti nalawag a prayoridad daytoy.
Kinuna na, ti badyet ket binukel iti panagayat iti ili, nauneg a pannaka-awat iti kasasaad dagiti umili, ken pudno a panangisakit kadagiti Pilipino.
Impaganetget ti Speaker a ti bersyon ti Kamara ket addaan ti kongkreto a benepisyo para kadagiti Pilipino, partikular iti edukasyon, salun-at ken agrikultura.
Iti sektor ti edukasyon, imbaga ni Dy a nakaawat daytoy ti kadakkelan a pondo iti pakasaritaan ti pagilian, kaibatugan ti 4.1 porsiyento a gross domestic product.
Nasurok 25,000 a silid-aralan iti maipatakder ken masimpa ken naan-anay a naisubli ti pondo para iti Universal Access to Quality Tertiary Education Program.
Para iti salun-at, papigsaen ti badyet iti PhilHealth ken iti Medical Assistance to Individuals and Financially Incapacitated Patients (MAIFIP) tapno masuportaran iti zero-balance billing para kadagiti nakurapay a pasyente iti pampubliko nga ospital.
Ngimmato pay ti pondo para iti agrikultura, a nakasentro iti tulong kadagiti mannalon ken mangngalap babaen ti farm-to-market roads, irigasyon, mekanisasyon, crop insurance, ken subsidiya.
Segun kenni Dy, iti badyet ket saan laeng a koleksyon iti numero ngem kaibatugan daytoy ti taraon iti lamisaan, agas iti ospital, ken edukasyon a manglukat ti ruangan iti mas nalawlawag a masakbayan.
Manamnama ti panagtataripnong ti Kamara inton Disyembre 29 tapno ratipikaran iti report ti bicameral conference committee, ti maudi nga addang sakbay a naan-anay a mapirmaan iti badyet kas linteg ni President Ferdinand R. Marcos Jr.
