Imbutaktak ni Batangas 1st District Representative Leandro Legarda Leviste a nangibati isunan ti pammilin kadagiti sumagmamano a tattao nga ipubliko dagiti amin a files wenno papeles apaman adda mapasamak a madi kenkuana.
Ti waragawag ni Leviste ita a Paskua ket kasaruno ti panangibutaktak na metlaeng ti 19-a-pinanid a listaan dagiti proponents ti Department of Public Works and Highways (DPWH) projects babaen ti P6.326-T 2025 national budget.
Nupay awan ti dinakamat na a partikular nga insertions dagiti mamanday-linteg, naipakita iti listaan dagiti minilyon nga “allocable” a tinawen a gatad a mabalin nga itukon iti tunggal kongresista.
Kinuna ni Leviste nga uray Paskua ket naagsaritaan dan ti ina na a ni Senador Loren Legarda ti maipanggep ti trabaho.
Pinalagipan nan ti ina na seknan ti direktiba a nu adda mapasamak kenkuana ket rumbeng nga iruar na amin a nabatbati a dokumento ken ituloy ti panangibutaktak ti impormasyon.
Kabayatanna, saan met a ninaganan ti mamanday-linteg dagiti tattao a binilin na.
Dinakamat na ti ipupusay ti sigud a DPWH Undersecretary Maria Catalina Cabral, a mapapati a nagtaudan ti listaan. Nagpakamatay daitoy iti maysa a rangkis idiay Benguet, insidente nga agdama paylaeng a maim-imbestigaran dagiti otoridad.
Ti kallabes a pannakiuman ket kinumpirma ni Leviste a pinapigsa na ti security detail na.
