Dumanon ti 140 iti bilang dagiti biktima ti paputok ita nga holiday season.
Maibasar iti monitoring ti Department of Health (DOH) manipud Disiembre 21 aginggana bigat kalman, Disiembre 30, nanayunan ti walo a baro a kaso dagiti nasugatan gapu ti paputok manipud kadagiti 62 sentinel hospitals.
Segun ti ahensia, 95 kadagiti biktima ket 19-anyos agpababa.
Kaaduan kadagiti nasugatan ket gapu ti paputok a 5-star, boga, ken dagiti saan a mabigbig a klase ti paputok.
Ti nairekord a kaso ti firecrackers-related injuries ita a tawen ket 23% a nababbaba maiyarig iti nailista nga 182 cases idi 2024.
Kabayatanna, agtultuloy iti balakad ti DOH iti publiko a dagos nga iturong iti ospital dagiti mabiktima ti paputok wenno umawag ti National Emergency Hotline 911 para iti emergency medical assistance.###
