BR LA UNION- Ubbing ti kaadwan a mabikbiktima ti paputok manipud iti pakabuklan 140 firecrackers-related injuries a nailista iti intero a pagilian sipud nangrugi ti holiday season ita a tawen.
Segun iti Department of Health, dua nga ubbing ti naiturong idiay Amang Rodriguez Memorial Medical Center kalpasan a nasugatan dagitoy ti paputok, ken agtultuloy a manay-nayunan dagiti kaso ita a bisperas ti Baro a Tawen.
Maibasar iti datus, maysa nga ubing ti nagsagaba ti pannaka-sinit iti kudil ken maysa ti nandangran iti mata na.
Kinuna dagiti doktor, ti five star ken boga, nga agpada nga iligal a kuna ti PNP, iti masansan a gapwanan dagiti insidente.
Segun kenni Health Secretary Teodoro Herbosa, narigat nga ipatungpal iti nationwide total ban iti paputok agsipudta nagduduma ti ordinansa iti lokal a gobyerno.
Adda pay kunana ti nasyunal a linteg ngem napateg latta iti impormasyon ken panangbaliw ti kababalin nangruna iti uneg ti pagtaengan.
Nagballaag ti DOH a ti pannakadangran iti paputok ket mabalin a mangparnuay ti nabayag nga epekto, kabilang iti permanente a diperensiya.
Nagpanawagan ti DOH iti publiko nga ipangruna ti kinatalged ken ipalagip a saan nga ay-ayam ti paputok, nangruna saan a para kadagiti ubbing.
