BR LA UNION – Umaboten iti pakabuklan a 655 iti bilang dagiti nailista a fireworks-related injuries iti intero a pagilian gaputi paputok idi selebrasyon ti paskua ken baro a tawen, segun iti Department of Health (DOH).
Daytoy ket iti tengnga ti agtultuloy a panagkalap dagiti datos ti DOH-Epidemiology Bureau, nangrugi idi Disyembre 21, 2025 agingga Enero 3, 2026.
Manipud iti nasao a bilang, 351 kadagiti biktima ket edad 19 agpababa, amin ket naglak-am ti naduma-duma nga injury ken pannaka-sinit iti kudil.
Maibasar pay iti datos ti ahensya, 19 a tattao ti napukawan ti ima wenno ramay ken 11 kadagitoy ket menor de edad.
Ti kaubingan a biktima ket agtawen ti uppat a napukawan ti ramay iti ima.
Kaadwan kadagiti kaso ket manipud iti saan nga ammo a klase ti paputok, agsipudta saan met a malagip wenno matandaan dagiti biktima ti inusar da a paputok; maikadwa ket gapwanan ti kwitis (sky rocket) ken ilegal a 5-star.
Nupay kasta, imbaga ti DOH nga iti agdama a bilang ket 20 a porsiyento a mas nababa nu ikumpara iti nailista nga 819 a pakabuklan a kaso idi Enero 3, 2025.
Pinalagipan ti publiko a dagus nga iturong iti kaasetgan nga ospital ti siasinuman a maputukan ti paputok tapno makaala ti libre a bakuna, ken maliklikan ti tetanus a kasapolan a maipaay iti uneg ti 8 agingga 21 nga aldaw.
