BR LA UNION – Awan ti serrek iti klase ken trabaho iti intero a pagilian inton Martes, Pebrero 17, 2026 kas panangrambak ti Chinese New Year ken naideklara a nationwide Special Non-Working Day, maiyannurot iti
Proclamation No. 1006.
Mainaig iti nasao a selebrasyon, nangiruar ti Department of Labor and Employment (DOLE) iti allagaden para iti umno a pasuweldo iti nasao nga aldaw.
Iti Labor advisory a pirmado ni DOLE Secretary Bienvenido Laguesma, dagiti empleyado a sumrek iti nasao nga aldaw ket mabayadan ti kanayunan a 30 percent iti basic wage iti umuna a walo nga oras.
Nu lumbes ti walo nga oras, kanayunan pay a 30 percent iti kada oras a panagtrabaho.
Dagiti empleyado a sumrek iti trabaho ngem naiparna a dayoff ket mabayadan ti kanayunan a 50 percent iti umuna a walo nga oras, nu lumbes ti walo nga oras ket manayunan ti 30 percent iti kada oras.
Dagiti met empleyado a saan a sumrek ket maipatungpal iti “no-work-no-pay” policy.
