Nangiserrek ti mosion iti National Bureau of Investigation tapno nayunan ti kabaruan nga ebidensia ken respondents iti reklamo a plunder a naipila kontra kenni Senador Jinggoy Estrada.
Segun kenni Justice Spokesperson Atty. Polo Martinez, kasaruno daytoy iti ‘motion to submit additional evidence and respondents’ iti biang ti ‘complainant’.
Iti naisayangkat a preliminary investigation seknan iti plunder case, saan a nangisubmitir ni Senador Jinggoy Estrada ti counter-affidavit.
Binilin ti prosekusion iti NBI nga ikkan ti kopya ti kanayunan nga ebidensya dagiti respondents aginggana inton Pebrero 26.
Iti biang dagiti respondents ket maipaayanda ti umdas a panawen ken gundaway tapno sungbatan daytoy aginggana Marso 9.
Kalpasanna ket sumaruno preliminary investigation mainaig iti reklamo a sangsanguen ti senador kadua dagiti sumagmamano a sigud nga opisial ti gobierno.
Malaksid kenni Senador Jinggoy Estrada, respondent met da sigud a Department of Public Works and Highways Secretary Manuel Bonoan, sigud a Public Works officials Roberto Bernardo, Gerard Opulencia, Henry Alcantara, ken John/Jane Does.
Karaman pay kadagiti pinilaan ti NBI-DOJ Bid-Rigging Task Force ti pimmusay ken sigud a Public Works Undersecretary Catalina Cabral.
Sangsanguenda dagiti reklamo a plunder, panaglabsing iti Section 3(e) ti Republic Act 3019 wenno ti Anti-Graft and Corrupt Practices Act, Receiving Gifts by Public Officers, ken Corruption of Public Officers.
Nagkedked ni Martinez nga ibinglay dagiti nagan nga innayonda kas kabaruan a respondents iti reklamo, gapu ta saan pay a naiserbi ti ‘subpeona’.
Rumbeng met a dummar-ay wenno agpakita ti personal dagitoy iti prosekusion tapno agsapata iti panagsangoda iti sumaruno nga hearing inton Marso.###
