Nainget a pinaglibakan ken kinontra dagiti lider ti House of Representatives iti akusasion dagiti nagpabigbig a sigud a kameng ti Philippine Marines.
Segun kenni Manila Representative Joel Chua, chairman ti House Committee on Good Government and Public Accountability, “mapagduaduaan” iti timing dagiti alegasyon.
Patien ni Chua a nairanta dagiti pammabasol a mangsinga iti masungad nga impeachment hearings kontra kenni Vice President Sara Duterte ken dadaelen iti kredibilidad ti Quad Committee.
Nangisayangkat iti komite ni Chua ken ti Quad Committee ti nalawa nga imbestigasion mainaig iti maipagarup a biddut a pannakausar ti ₱612.5 million confidential ken intelligence funds ti Office of the Vice President (OVP) ken Department of Education (DepEd).
Nainget met a pinaglibakan dagiti dadduma a mammanday-linteg dagiti alegasion.
Iti biang ni Manila Representative Bienvenido Abante Jr., inawaganna a “kinaulbod ken malisyoso” iti akusasion nga immawat isuna dagiti maleta a naglaun ti kuarta.
Segun kenni Abante, mapunpuntirya isuna gapu iti natibker a takderna kontra dagiti extrajudicial killings (EJK) iti sidong ti Duterte Administration.
Inawagan met ni Deputy Speaker Paolo Ortega a “delulu” wenno “delusional” dagiti mangisaksaknap dagiti estoria nga awanan ti kinapudnona wenno basaran.
Inlawlawag met ni Representative Julienne Baronda nga iti kaanuman ket saan a nairaman iti naganna iti aniaman a flood control scam ken ti pannakairamanna ket paset laeng ti “political circus.”
Pagpanpanunutan metten iti liderato ti Kamara iti panangipila ti katupag a kaso maibusor kadagiti adda iti likudan dagiti nasao nga akusasion tapno mataginayon iti integridad ti institusion.###
