BR LA UNION – Immandar ni President Ferdinand Marcos Jr. iti amin a government agencies nga agsalimetmet ti kuryente iti tengnga ti pangta ti panagngato ti presyo ti langis iti world market.
Inallokoy pay ti Presidente iti publiko a makikaysa iti panagsalimetmet.
Segun iti Presidente, ti krisis a mapas-pasamak idiay Middle East ket mabalin a mangigubway ti dakkel nga epekto iti sangalubongan a presyo ti langis, isunga ad-adalen ti gobyerno dagiti contingency measures tapno mapalag-an iti epekto daytoy kadagiti consumers.
Siniguro ni President Marcos Jr. nga adda umdas a langis iti Pilipinas a mabalin nga agpaut ti 50 agingga 60 nga aldaw, iti tengnga ti kumarkaru a tensyon idiay Middle East a manamnama a mangiduron iti panagngato ti presyo ti langis iti intero a lubong.
Inlawlawag na a nupay posible a ngumato iti presyo ti langis gaputi geopolitical tensions, saan a dagus nga agpeligro iti pagilian iti panagkurang iti suplay gapwanan ta adda stockpile ti gasolina, fuel oil, ken kerosene.
Innayon na, dagiti supplier ti petroleum products ket addaan ti bukod nga imbentaryo a mabalin nga irwar tapno agserbi a kanayunan a suplay ti pagilian.
Nangipeksa ti namnama iti Presidente a saan nga agpaut iti krisis, maibasar iti waragawag ti Estados Unidos a mabalin nga umabot laeng daytoy ti uppat agingga lima a lawas.
Impalagip ti Presidente a nu agpaut ti rinnupak idiay Middle East ket mabalin a mangi-ngato ti peligro iti kinatalged dagiti sibilyan ken lalo a maka-apektar ti sangalubongan nga ekonomiya.
