BR LA UNION – Inallokoy ni Manila Cathedral rector Msgr. Rolando R. dela Cruz dagiti katoliko nga iyasideg ti espiritual a bagi iti Diyos, kagiddan iti obserbasyon ti Semana Santa.
Inaramid daytoy ni Msgr. dela Cruz kabayatan ti homily na idi kalman, Lunes Santo (March 30, 2026).
Kinuna na nga adu dagiti agtur-turong iti simbaan iti inaldaw ken umaw-awat ti communion, ngem iti likudan kunana ti panagturong iti pagtaengan ti Diyos ngem maiyad-adayu met latta ti bagi gapu iti saan a nasayaat a kapanunutan wenno aramid.
Inyarig ti padi iti napasamak kenni Judas Iscariot, a maysa kadagiti 12 apostles ni Hesu-Kristo nga uray asideg isuna iti Diyos ken pinili na nga agbalin nga adalan, ngem saan a nasayaat ti panunot ni Hudas agsipudta nagpannuray kenkuana ti sileng ti pirak ket kinabaelanna a traydoren ni Hesus.
Impaganetget pay ni Msgr. dela Cruz a ti panagbalin nga adalan ti Diyos ket saan a marukod iti kanayon a pannakimisa wenno iti kina-asideg iti simbaan, ngem ketdi iti panangtungpal dagiti bukod a pagrebbengan iti Diyos ken iti pada a tao.
