BR LA UNION – Natalged a naiyakar dagiti 18 hiker kalpasan a timpuar ti grass fire idiay Mt. Kabunian, Bakun, Benguet idi Huwebes Santo, Abril 2, 2026.
Awan ti naipadamag a nasaktan, ket maibasar iti inisyal nga imbestigasyon, kinabara ti panawen ti nakaigapwan ti uram.
Kas sungbat, temporaryo nga impawil ti lokal a gobyerno ti amin nga hiking ken trekking iti nasao a bantay tapno masiguro iti kinatalged dagiti turista.
Segun iti Bakun Municipal Disaster Risk Reduction and Management Council (MDRRMC), 11 a turista ken dua a tour guide ti adda iti tuktok ti bantay idi timpuar ti apoy, bayat a pito a turista ken maysa a guide ti na-stranded iti Station 12 iti sakaanan ti bantay.
Dagus a nagresponde iti Bureau of Fire Protection, lokal a pulis, opisyal ti barangay, ken tour guides.
Narescue ket naiyakar dagiti pito a hikers manipud Station 12 ken naiturong da iti barangay hall agarop alas-2:45 ti parbangon idi Biyernes Santo, Abril 3.
Bayat a 11 hikers iti tuktok ti bantay ti naiyakar babaen ti panagdalan da iti sabali a ruta idiay Bulisay, Kayapa, Nueva Vizcaya.
Kabayatanna, adda met napasamak a wildfire idiay Mt. Lamesang Bato a nagpaut ti lima nga oras ken immabot iti first alarm sakbay a nasebseban. Awan ti naipadamag a perdisyon iti nasao nga insidente.
Agtultuloy iti imbestigasyon dagiti otoridad tapno amwen ti makagapo dagiti uram ken maamwan ti kalawa ti perdisyon dagiti apektado a lugar.
