BR LA UNION – Inwaragawag ni Bicol Saro Party-list Rep. Terry Ridon nga ibilangna a “nalpasen,” ti isyu ti maipagarop a confidential fund misuse, bribery, ken unexplained wealth kontra kenni Bise Presidente Sara Duterte, ken maipagarop nga umdasen nga ebidensiya tapno makairwar ti probable cause iti kaso ti impeachment.
Segun kenni Ridon, nalawag a natibker ti basaran dagiti alegasyon, partikular ti report ti Anti-Money Laundering Council a mangibagbaga nga adda agarup P6.7 billion a “covered” ken “suspicious” transactions a konektado kada Sara Duterte kenni asawana a ni Manases Carpio manipud 2006 agingga 2025.
Impaganetgetna nga uray no inflows ken outflow dagiti transaksiyon, dakkel latta ti diperensiya no ikumpara iti naideklara a kinabaknang ti Bise Presidente.
Dinakamat na pay ti mapapati a P40 million transaction idi 2022 a maipagarup a saan a maitunos iti naideklara a net worth nga aganay P70 million.
Innayon ni Ridon nga uray ti pakabuklan a birok dagiti agassawa kas abogado ken opisiyal ti gobierno, agraman ti income tax records-da a mapattapatta a P73 million, saan latta nga umanay dagitoy tapno mailawlawag ti binilyon a transaksiyon ti kuarta a linaun iti account-da.
Kabayatanna, manamnama nga agdesisyon ti House Justice panel inton Abril 29 seknan iti agbalin a pinal nga addang iti impeachment complaint kontra kenni VP Sara.
