Inyunay-unay dagiti dadakkel a grupo dagiti employers ditoy Pilipinas a nasaysayaat iti panagkissay ti buis ngem iti panangipangto iti sueldo dagiti mangmangged, kagiddan iti panawagan manen para ti wage hike ita a Mayo Uno wenno Labor Day.
Segun kenni Sergio Ortiz-Luis Jr. manipud Employers Confederation of the Philippines, marigrigatanen dagiti adu a kompanya gapo iti panagngato iti gastos isu a saan dan a kabaelan pay nga ipasa ti kanayunan a sueldo a saan nga agpeggad ti operasyon ken trabaho dagiti empleyado da.
Impakdaar na pay a mabalin nga agtungpal ti posible a wage hike iti kaawan ti trabaho nga imbes a panagngato ti employment rate.
Iti kangitingitan a singasing para ti ₱200 nga umento iti sueldo ket naipaganetget pay ti epekto na ti implasyon a dimmanon ti 4.1% idi bulan ti Marso, gapo kadagiti global factors a kas iti gyera idiay Middle East.
Kas alternatibo ket inlungalong ni Ortiz-Luis iti panagkissay ti excise tax ken value-added tax (VAT) iti langis tapno direkta a bumaba ti presyo dagiti magagatang ken makissayan ti gastos dagiti negosyo a kunana ket nalawlawa ti positibo nga epekto na iti ekonomiya.
