BR LA UNION – Inawagan ni Catholic Bishops Conference of the Philippines (CBCP) Episcopal Commission on Interreligious Dialogue chair, Bishop Jose Colin Bagaforo kas ‘test of accountability’ iti impeachment case kontra kenni VP Sara Duterte.
Segun iti obispo ti Kidapawan, saan daytoy a maibilang a political persecution, ngem ketdi maysa a proseso konstitusyonal, iti tarigagay a masiguro nga agsungbat dagiti nangangato nga opisyal ti gobyerno iti publiko.
Segun kenni Bagaforo, saan daytoy a rumbeng a pagbutngan agsipudta maitunos daytoy iti ‘due process’ a panangbigbig iti karbengan ti impeachable officials.
Salodsod ti obispo, apay koma a pagbutngan ti due process? Nu inosente ti maysa nga indibidwal, sigurado kunana a lalo pay a mapatibker ti panagbalinna nga inosente babaen ti legal process.
Segun pay iti Catholic leader, rumbeng nga ibilang ni VP Sara iti impeachment process kas maysa nga oportunidad tapno dalusan ti naganna.
Ballaag na, ti panangkedked iti accountability ket sigurado a lalo a mangibaba iti talek ti publiko iti gobiyerno, nangruna iti Pilipinas a nabayagen nga agprob-problema iti korapsyon.
Iti panawen nga agdua-dua dagiti umili iti integridad dagiti public institution, segun iti obispo, saan a rumbeng nga exempted dagiti highest official ti pagilian iti accountability.
Iti udi, impaganetget ti obispo a ti panangamiris dagiti ebidensiya, kasapolan nga agpannuray ken rumwar ti kinapudno.
