BR LA UNION – Rinugyanen ti Philippine National Police (PNP) – Anti-Cybercrime Group a sukimaten dagiti CCTV camera footage a maipagarop a naglaun kadagiti pasamak sakbay iti shooting idiay Senado idi Miyerkules.
Daytoy ket laksid iti immunan a waragawag ti Senate security nga awan ti footage a naglaun iti mismo a napasamak a pammaltog.
Naipa-ima iti PNP dagiti ‘available’ a footage kas paset ti imbestigasyon.
Iti agdama, limitado latta iti impormasyo nga inruar ti pulisya seknan dagiti footage ngem, ti iggem da a video ket naala manipud iti naduma-duma nga anggulo iti uneg ken aglawlaw ti Senate building.
Nangisayangkat metten ti PNP ti 3D reconstruction nga indaulwan ti PNP Forensic Group.
Agserbi a pokus ditoy iti trajectory ken dimmalanan ti bala, shell casings, ken ti impact points wenno tinamaan ti bala.
Babaen daytoy ket mangnamnama iti PNP a madetermina iti lokasyon dagiti shooter ken mabukel iti ladawan seknan iti sinnukat ti bala.
Segun met kenni PNP spokesperson Police Brig. Gen. Randulf Tuaño, agtultuloy ti panagkalap ti pulisya iti ebidensiya kas ti body camera recordings, media footage, ken dagiti video manipud kadagiti testigo, bayat nga agtultuloy iti imbestigasyon.
