Nangipeksa ni Bise Presidente Sara Duterte ti panakiladingit kadagiti pamilya ti Ateneo Blue Eagles men’s basketball team members nga isuda Rene Clert Baterbonia ken Divine Adili, ket impaganetget a kurang ti nagbalin a sungbat ti Ateneo de Manila University kadagiti natayan.
Kasaruno daitoy ti waragawag manipud Ateneo a mangisayangkat ti Board of Trustees da iti fact-finding investigation mainaig ti pannakalmes dagiti dua a student-athletes ti maysa a team-building activity idiay Dipaculao, Aurora idi Hunyo 8.
“Nakakalungkot na ganoon ‘yong nangyari sa isang estudyante at sa isang promising na athlete natin sa bansa”
Iti pannakiuman idiay Davao City idi Hunyo 12 ket kinuna ti Bise Presidente a makapaliday iti nagbanagan dagiti dua nga atleta nga addaan ti dakkel a potensyal iti lubong ti sports.
“Pakiramdam ko, kulang na kulang ‘yong response ng Ateneo hindi lang kay Rene, doon din sa isang foreigner na player din ng Ateneo na namatay”
Segun pay iti Bise Presidente, nasken a maipaayan ti madagdagos nga impormasyon ken supporta dagiti pamilya iti kastoy a kanito ti trahedya.
Agraman ditan ti panagbalin a prayoridad dagiti unibersidad ti naannayas a koordinasyon tapno mailawlawag ti insidente kasta met kadagiti maiyannatop a maaramid nga addang.
Impaganetget na a ti panagpusay da ket kurang iti suporta nga agdama a maaw-awat ti pamilya.
“Dapat kasi, sa ganiyang mga panahon, ay nauuna ‘yong pag-reach out nila sa pamilya at pagpapaintindi nila sa pamilya kung ano ‘yong nangyari at ano ‘yong mga kailangan nilang gawin”
Kabayatanna, agtultuloy met ti imbestigasyon iti Ateneo ken maseknan nga ahensya tapno madakamat ti sibubukel nga impormasyon iti pannakalmes dagitoy.
“Pakiramdam ko ay malaki ang pagkukulang ng paaralan sa pagbibigay suporta sa pamilya”
Iti agdama ket naisublin idiay Davao City ti bangkay ni Baterbonia bayat nga agtaltalinaed met sadiay Arlington Memorial Chapels and Crematory idiay Quezon City ti bangkay ni Adili.
