BR LA UNION – Nangipaay ti Department of Agriculture Regional Office I (DA-RFO I), kabinnulig ti Lokal a Gobierno San Juan, ti tulong para kadagiti mannalon nga agmul-mula ti mais kas paset ti agtultuloy a suporta tapno mangparang-ay ti produksiyon iti agrikultura ti nasao nga ili.
Naaramid ti distribusyon iti de kalidad a yellow corn seeds ken Bio-N Fertilizer idi kalman, Miyerkules, Hunyo 17.
Pakabuklan a 200 a mannalon iti nabunongan ti libre a bukel ti mais (yellow corn) ken abono tapno suportaran iti panagmula da ita nga off-season cropping, a manamnama a makatulong a mangpaadu ti apit ken makissayan ti gastos iti produksiyon.
Tunggal maysa ket immawat ti maysa a sako ti bukel ti mais ken maysa a pakete ti abono.
Paset daytoy iti agtultuloy a suporta ti Department of Agriculture kadagiti mannalon tapno umado ti apit a mais iti laksid dagiti karit iti sektor ti agrikultura ken masigurado ti umdas a suplay ken seguridad ti taraon iti probinsiya.
Dinayaw met dagiti benepisiaryo ti nasao nga inisyatiba gaputa dakkel a tulong daytoy para iti ad-adu nga apit ken makissayan ti dakkel a gastos gaputi nangato a presyo dagiti agricultural inputs.
Kabayatanna, agtultuloy ti pannakitinnulong ti DA kadagiti lokal a gobierno tapno maidanon dagiti nadumaduma a programa ken serbisio ti agrikultura tapno mapasayaat ti panagbiag dagiti mannalon ken mapadur-as ti sektor ti agrikultura ditoy probinsiya ken rehiyon.
