BR LA UNION – Nagturpos a saan a nalukatan iti sealed box manipud Bureau of Internal Revenue (BIR) a maipagarop a naglaun iti tax documents ni Vice President Sara Duterte bayat ti naudi nga aldaw ti pre-trial conference para iti impeachment case ti Bise Presidente.
Segun iti House prosecution panel, kiniddaw da a lukatan ken aramiden nga ebidensya ti nasao a kahon ngem saan a nadesisyunan agsipudta kasapolan nga agsumite pay nga umuna ti komento iti kampo ni VP Sara sakbay nga agdesisyon ti Senate impeachment court nu mabalinen a lukatan ti nasao a kahon ken usaren kas ebidensya iti panagusig.
Maipalagip nga impa-seal iti ”green box” ti House Justice Committee kalpasan a kinedkedan ti Bureau of Internal Revenue a lukatan daytoy idi hearing ti reklamo nga impeachment idiay House of Representatives.
Iti likudan daytoy, imbaga ti prosecution panel a naisagana ken namarkaan met ti dadduma nga ebidensya a kayat da nga idatag iti pormal nga impeachment trial.
Manamnama a mangiruar ti Senate impeachment court ti pre-trial order nga agserbi a giya iti sumaruno nga addang ti impeachment trial.
Ni VP Sara Duterte ket sumangsango iti reklamo nga adda pakainaiganna iti maipagarop a panaglabsing iti Konstitusyon, graft and corruption, extortion, betrayal of public trust, ken dadduma pay a nadadagsen a kaso .
Kabayatanna, agtultuloy a kidkiddawen iti korte ti kampo ti bise presidente nga ibasura iti impeachment case.
