BR LA UNION – Patas koma ti linteg para kadagiti ordinaryo nga umili ken opisyales ti gobyerno.
Daytoy ti inwaragawag ni House Deputy Speaker Paolo Ortega V ti La Union kalpasan nga inyarigna ti pangta ni Bise Presidente Sara Duterte iti pannakatiliw ti maysa a teacher idi 2020.
Dinakamat ni Ortega a no naaresto ti maysa a public school teacher a ni Ronnel Mas, gapu iti panangipaskilna iti angaw nga ipaayanna ti P50 milyon tapno ipapatay ni sigud a Presidente Rodrigo Duterte, mas lalo ngarud a saan nga ibilang a simple a free speech ti mas nadagdagsen a pangta ti bise presidente.
Maipalagip a direkta nga imbaga ni VP Sara nga adda imbilinna a mangpapatay kada Presidente Ferdinand “Bongbong” Marcos Jr., First Lady Liza Araneta-Marcos, ken sigud nga Speaker Martin Romualdez no bilang isuna ti mapatay.
Segun kenni Ortega, saan a mabalin nga ipaayan iti ispesyal a rason ti maikadwa a kangatuan nga opisyal ti pagilian idinto a napartak a madusa ti maysa nga ordinaryo nga umili.
Innayon ti mammanday-linteg a mas seryoso ti tunggal sao ti bise presidente gaputa isu ti umuna a nakapila iti sidong ti Konstitusyon nga agbalin a presidente no mabakante ti posisyon idiay Malacañang.
Impaganetget ni Ortega a ti Senate impeachment court ti umno a lugar a mangdetermina no maikari met laeng ni Duterte iti puwestona, ken rumbeng a sumango iti panagusig ti kampona tapno matingiting nu iti nagbalin a waragawag na ket maysa a seryoso a panaglabsing iti panagtalek ti umili.
