BR LA UNION – Agtultuloy iti panangipakita ti suporta ken serbisyo publiko ti Provincial Government ti La Union kadagiti komunidad kalpasan a naipaay ti 49 a brand-new a Multi-Purpose Vehicles (MPVs) para iti amin a barangay idiay Agoo, La Union.
Naisayangkat ti turn-over ceremony nga indauluan daytoy ni Governor Mario Eduardo C. Ortega, Vice-Governor Eric O. Sibuma ken dagiti Board Members, iti Francisco Ortega Convention Center, ditoy syudad ti San Fernando, La Union idi kalman Hunyo 30, 2026.
Personal met nga inawat dagiti barangay officials ti Agoo dagiti nasao a lugan a na-ponduan iti sidong ti La Union Provincial Disarter Risk And Reduction Management Fund iti probinsiya, a makatulong iti dagus a panag-responde kadagiti emergency ken rescue operations iti panawen ti didigra.
Kagiddan ti turn-over ceremony, inyanunsiyo pay ni Gov. Mario Ortega a ti agdama a ₱20,000 a maipapaay iti tunggal barangay ket manayunan ti ₱10,000 kas suporta iti maintenance, gasolina, ken dadduma pay a kasapulan a pinansiyal dagiti lugan tapnu masigurado nga episyente iti serbisyo para iti tunggal umili.
Impaganetget pay ti Gobernador nga saan pay a nagleppas iti programa, gaputa tarigagay ti gobyerno a maikkan ti lugan iti amin nga ili ditoy La Union a maaramat iti pagkasapulan dagiti umili.
Malaksid kadagiti barangay, nakaawat met ti Bureau of Jail Management and Penology La Union (BJMP) iti baro a Toyota Innova a makatulong iti panangipaay ti napinpintas a serbisyo kadagiti umili ken iti amin a ganwat ti probinsiya.
