Nakasagana iti Philippine National Police-Criminal Investigation and Detection Group National Capital Region (CIDG NCR) nga ipatungpal ti anyaman a warrant of arrest nga iruar ti korte kontra iti nangangato nga opisyal ti gobyerno.
Daytoy ket kasaruno ti umadanin a pannakaipila ti plunder case kontra kenni Senador Rodante Marcoleta mainaig iti mapapati a P75-milyon a donasyon a naawatna bayat ti panagserbina kas kongresista, sakbay a timmaray idiay Senado idi 2025.
Ti plunder wenno panagkunniber ket maysa a non-bailable offense.
Segun kenni CIDG NCR chief Col. John Guiagui, awan pay ti naawatda nga arrest warrant kontra iti asinoman a nangato ti ranggona nga opisyal, ngem nakasagana ti CIDG a mangipatungpal a dagus apaman a mangipaulog ti korte iti bilin.
Immunan nga impakaammo ni Ombudsman Jesus Crispin Remulla nga asidegen a maipila ti kaso kontra kenni Marcoleta.
Kasaruno daytoy, nangisayangkat ti Iglesia ni Cristo iti tignay protesta a mangsuporta iti senador ken impaganetget da a ti kaso ket maysa a pagarigan ti “selective justice.”
Kabayatanna, impanamnama ni Guiagui nga agtultuloy ti manhunt operations ti CIDG kontra kadagiti dadduma pay nga akusado nga indibidual nga agtaltalinaed a nawaya mainaig iti maipagarop a flood control corruption scandal.
