LA UNION – Inwaragawag ni La Union Governor Mario Eduardo Ortega iti kinasagana nga ipadanon ti State of the Province Address wenno SOPA na a nakatuding a maangay iti regular session ti Sangguniang Panlalawigan inton Hulyo 28, 2026, aldaw ti Martes, nu sadinno ket agserbi isuna kas resource speaker.
Maital-o iti SOPA dagiti naaramidan ti Provincial Government of La Union iti umuna na a tawen kas Gobernador ti probinsya. Mailatag ditoy dagiti prayoridad, programa, ken plano ti lokal a gobierno para kadagiti sumaganad a tawen.
Mangipaay daitoy kadagiti miembro ti Sangguniang Panlalawigan ti maysa a comprehensive report mainaig iti nagbalin a progreso ti probinsya ken ti direksiyon a turongen na inton masakbayan.
Segun kenni Gobernador Ortega, nangrugi iti panagsagana para iti panabetla na idi katugtugaw na paylaeng iti puesto.
Agtultuloy met iti panagkalap, panagdokumento, ken panangipirmis kadagiti reports seknan ti programa ken inisyatiba ti gobierno babaen ti administrasyon na nga agserbi’n to a basaran iti panagbetla.
Manamnama nga ilinya dagiti miembro ti Sangguniang Panlalawigan dagiti singasing a gakat ken legislative measures da iti agenda ti SOPA nga ad-adda pay mangbiag iti nagkaykaysa a bisyon ti administrasyon para iti La Union.
Pinatibker manen ni Gobernador Ortega iti panangitandudo na iti tema nga “Agkaysa” ken impaganetget a tunggal Elyucano ken Elyucana ket addaan iti napateg nga ambag ken agtaltalinaed a kabinnulig para iti panagrang-ay ken balligi iti probinsya. | via Bombo Rafael Galano
