BR LA UNION – Umaboten ti 17 ti nailista a natay iti panagduprak ti bagyo Inday ken Habagat, maibasar iti kauddian a report ti National Disaster Risk Reduction and Management Council (NDRRMC).
Segun iti ahensiya, dagiti natay ket gapu iti pannakalmes ken landslide, ngem kasapolan pay a ma-validate ti nasao a report.
Dagiti casualties ket manipud Malapatan, Sarangani (10); Calanogas, Lanao del Sur (5); ken Bukidnon (2).
Uppat met a tattao iti nailista a nasugatan ken siyam ti agtaltalinaed a missing.
Kabayatanna, nasurok 514,700 nga indibidwal wenno kaibatugan ti 112,500 a pamilya iti naduma-duma a rehiyon ditoy pagilian iti apektado ti kalamidad.
Manipud iti nasao a bilang, aganay 2,900 a pamilya iti na-displace ken temporaryo nga agtaltalinaed iti 77 nga evacuation centers.
Mainaig ti daytoy, nakaibunong metten ti gobyerno babaen ti Department of Social Welfare and Development (DSWD) ti nasurok P16.4 milyon a tulong pinansyal ken relief goods para kadagiti umili a nakaru a maap-apektaran ti panagtudtudo ken panaglayos.
