BR LA UNION – Talantanen iti sumaruno a lawas dagiti kontrobersiyal a nagan nga adda pakainaigan iti maipagarop nga anomalous use of confidential and intelligence funds (CIF) ni Bise Presidente Sara Duterte.
Karaman ditoy iti Mary Grace Piattos, Milky Sikuya, ken dadduma pay a nagan nga immuna a rimwar idi inimbestigaran ti House Committee on Public Accountability and Good Government ti intelligence funds ti Bise Presidente.
Segun kenni House Prosecutor Terry Ridon, amin a nagan a maipagarop a nagserbi a recipient wenno nakaawat ti intelligence funds ket posible a rumwar iti panangtalanan ti maipapan iti pondo—maysa a banag a sakupen ti Article I ti Articles of Impeachment.
Kinunana a naan-anay nga agsagsagana ti panel para iti panangi-presintar da iti nasao nga isyu, agraman dagiti ebidensiya a mangsuporta iti alegasyon.
Plano ti panel ti mangidatag kadagiti report manipud iti Philippine Statistics Authority (PSA), a segun kenkuana, mangpaneknek no adda dagiti rekord para kadagiti nasao a nagan.
Maipalagip a sinertipikaran ti PSA nga awan dagiti kontrobersiyal a nagan iti database-da ken awan dagiti birth records a mangsuporta iti maipagarop a pannakayanak dagitoy.
Immuna a nagparang dagiti nasao a nagan kadagiti acknowledgment receipts a naaramat a mangsuporta iti liquidation ti confidential funds para iti Office of the Vice President ken Department of Education, iti panangidaulo ni VP Sara.
