BR LA UNION – Agtultuloy ti panagtudtudo iti Luzon gaputi Southwest Monsoon wenno Habagat inton bigat, Lunes, bayat a tallo pay a weather system iti imon-monitor ti PAGASA iti ruar ti Philippine Area of Responsibility (PAR).
Segun iti PAGASA, ti Batanes ti addaan kadakkelan a posibilidad a makapadas ti monsoon rains.
Nangato pay ti posibilidad a napigpigsa ti panagtudo iti Ilocos Region, Cordillera Administrative Region, Cagayan Valley, Central Luzon, Cavite, Batangas, Rizal ken Occidental Mindoro.
Iti dadduma a paset ti Luzon, namnamaen ti isolated rain showers gapu pay laeng ti Habagat.
Kabayatanna, agbalin a nadaga-ang ti panawen idiay Visayas ken Mindanao, nupay posible latta dagiti isolated rain showers.
Maysa kadagiti tallo a weather systems nga imon-monitor iti ruar ti PAR ket iti Typhoon Saudel, a naudi a nasaripatpatan iti kaadayu a 1,950 kilometro daya ti Extreme Northern Luzon.
Kabuyog ti angin a 165 kilometro kada oras ken kapegges nga umabot iti 205 kilometro kada oras, bayat nga agtur-turong iti amianan-a-laud iti kapartak a 30 kilometro kada oras.
Segun iti state weather bureau, namnamaen a sumrek ti bagyo Saudel iti PAR inton Lunes ti agsapa wenno malem. Posible pay a pumigsa daytoy ken agbalin a super typhoon sakbay a sumrek iti PAR.
Nupay kasta gaputi kaadayu daytoy, saan a namnamaen a direkta a tumama iti kadagaan ti Pilipinas ken posible a rumwar met laeng iti PAR inton Martes.
Segun pay iti weather bureau, lalo pay a pumigsa iti Habagat ken nangato ti posibilidad a panagtudtudo agingga Miyerkules.
Kabayatanna, agtultuloy pay a mamon-monitor iti dua a Tropical Depression iti ruar ti PAR.
Maysa ditoy ti bagyo a naudi a nasaripatpatan iti kaadayu a 1,265 kilometro daya ti Southeastern Luzon, kabuyog ti angin a 55 kilometro kada oras ken kapegges nga umabot iti 70 kilometro kada oras.
Dup-dupagenna iti pa-amianan-a-daya iti kapartak a 15 kilometro kada oras.
Segun iti PAGASA, posible a suruten na iti direksyon ti Typhoon Saudel isunga saan a maipa-igid iti posibilidad a sumrek met daytoy iti PAR.
Bayat a ti Tropical Depression Gaeneri, a sigud a bagyo Neneng, ket naudi a nasaripatpatan iti kaadayu a 520 kilometro amianan ti Itbayat, Batanes.
Agtultuloy a mamon-monitor ngem awanen ti direkta nga epekto na iti pagilian.
