BR LA UNION – Nangisayangkat ti Provincial Government of La Union (PGLU) babaen ti Office of the Provincial Agriculturist (OPAG) iti technical briefing session kadagiti mannalon idiay Rosario, La Union tapno isuro dagiti climate-smart strategies kas panagsagana iti posible nga epekto ti El Niño.
Naisayangkat ti sesyon kabayatan ti 3rd Quarter Meeting ti Municipal Agriculture and Fishery Council (MAFC) idi Oktubre 5, 2026.
Dagiti topiko ket pakairamanan ti Climate Change Adaptation and Mitigation, agraman ti pannakailawlawag dagiti manamnama nga epekto ti El Niño ken dagiti alternatibo a bukel a mabalin nga imula kadagiti lugar a mabalin a makapadas iti kinakurang ti danum.
Babaen ti nasao nga aktibidad ket maipaayan dagiti mannalon ti pannakaammo ken dagiti praktikal a wagas tapno makasalimetmet ti danum ken mataginayon ti produksiyon iti laksid ti panagbalbaliw iti kasasaad ti paniempo.
Segun iti PGLU, napateg unay ti panagsagana dagiti mannalon kadagiti mabalin nga epekto ti El Niño, a manamnama a marikna manipud Nobyembre 2026 agingga iti umuna a kagudwa a paset ti tawen 2027.
