BR LA UNION – Personal manen a simmango ni sigud a Presidente Rodrigo Duterte iti International Criminal Court (ICC) idi kalman, Martes, iti maikadwa a gundaway iti uneg ti dua a bulan, seknan iti kaso a crimes against humanity a sangsangwenna gaputi kampanya kontra droga.
Dimmar-ay ni Duterte iti maikapat nga status conference, a nairanta tapno maurnos dagiti detalye ken panagsagana para iti panagusig.
Nakatugaw isuna iti likod dagiti abogado na ken nagusar ti headset bayat ti kumperensiya.
Maipalagip nga immuna a dimmar-ay ni Duterte iti status conference babaen ti video link idi naiturong idiay The Hague.
Saan met a dimmar-ay iti sumagmamano a napalabas a panagdengngeg sakbay a personal a simmango iti maikatlo nga status conference ti kaso idi Setyembre.
Sumangsango ti sigud a presidente iti tallo a bilang ti crimes against humanity.
Segun kadagiti prosecutor, maipagarop a maipab-pabasol iti sigud a presidente iti 76 nga insidente ti pammapatay manipud 2013 agingga 2018 iti tengnga ti kampanya na kontra kadagiti agus-usar ken agilaklako ti ilegal a droga.
Intuding ti ICC inton Nobyembre 30 kas panagrugi ti panagusig a mabalin nga agpaut ti sumagmamano a bulan wenno tawen.
